著衫大作戰

星期三, 2018年12月12日

某個冷鋒過境的早上，天氣預報員和家人就該穿多少衣服討論了一番。

預報員家人：收音機話今朝各區氣溫普遍比尋日低幾度，跌到13、14度。但屋企跌溫（瞄一瞄溫度計）連兩度都唔夠，等我尋晚仲幫阿仔加咗好多衫、又加厚啲被瞓覺，焗親佢添！

預報員：其實冷鋒啱啱先過境，石屎建築物溫度反應比較慢，初時牆壁嘅深層仍然保存之前吸收嘅熱能，慢慢釋放出嚟，所以屋企通常會滯後一兩日先明顯跌溫。

出門後

預報員家人：嘩！剛才帶阿仔返幼稚園，喺出面凍死我哋喇，我見有啲街坊甚至著羽絨外套添！

預報員：今日外面好大風，容易帶走身體嘅熱量，再加上多雲同有雨，由於水嘅導熱能力比空氣高，落雨時喺身體附近嘅水點較容易令人體熱量向外流失，所以感覺特別冷。

預報員家人：你又唔喺我出門口前講？早知幫阿仔著多啲衫返學啦！

預報員：……

數天後室外氣溫回升

預報員家人：你又話氣溫開始回升，點解今朝起身屋企仲係涼浸浸？

預報員：道理很簡單，記唔記得幾日前講過…

預報員家人：知啦知啦，又係同石屎有關嘛！

預報員：低溫持續咗幾日，牆壁嘅餘熱已經消耗。而石屎建築物除咗散熱慢，吸熱亦較慢，視乎屋企坐向、通風情況、日照多少同室外溫度上升速度，屋企升溫通常會比室外滯後一兩日，所以我哋喺室內仲會感到陣陣寒氣。千祈唔可以掉以輕心，要確保阿仔喺屋企著夠衫保暖呀！

預報員家人：原來係咁。我都要打電話提提六嬸，佢行動不便，好多時間都留喺室內，一定要著夠衫。

預報員：老人家身體熱能容易流失，最凍嗰日未必係最危險。由於發病情況有滯後現象，所以就算氣溫略有回升，我哋都要關心老人家嘅身體情況呀！

蔡瑞聰    郝孟騫